الخطيئة
*************
حبيبتي أنا ٠٠٠٠٠٠
بعتذر عن إستمراري في حبك
وأنا عارف إن هينجرج قلبك
لكن فيه حاجات
كان لازم تعرفيها
مقدرتش في البداية
إن أأقولك عليها
( من فرحتي بالحب )
حاجات ممكن تكرهك فيا
وحاجات ممكن تحببك فيا
( والموضوع كبير وصعب )
وأبدأ منين ؟؟؟
من أول ما إتقابلنا
وفي إيدينا الورود
والشوق كبر ما بينا
وعدي بينا الحدود
وحلفنا يمين ما منا
حد يخون الوعود
واللا
من أول ما دوبنا
وعرفنا الهوى
ولا حسينا بوجودنا
غير وإحنا سوى
ولا جرح في قلوبنا
إلا وكان له دوا
حبيتك أيوة موت
لكن جويا شئ
واديني بأعلى صوت
بقولك مش برئ
خايف العمر يفوت
ويموت حلمك غريق
حبيبتي خلاص كفاية
عليكي سنين خداع
حياتي من البداية
مركب ملهاش شراع
مش عايز النهاية
تبقى ليكي ضياع
مكنتش أصدق إني
هيجي يوم وأحب
وقلبي جوا مني
يتعلق يوم بقلب
ويصحي ضميري ويإلمني
وأحس بأكبر ذنب
دلوقتي ليكي الإختيار
من إنسان
لا يعرف أم له ولا أب
إنسان نفسه يعيش
زي كل الناس
إنسان مايملكش من دنيته
غير قلب وروح بريئة
( ويجي حبه إحساس )
إنسان بيفطر غُلب
وبيتغدا ويتعشا غُلب
من مجتمع جاهل
بيحمله ( خطيئه )
مالوش فيها ذنب
