يا شهرزاد
لمى الكلام ما تبعتروش فوق الوسايد
والبُسط
لمى الحروف من فوق شفايفك واسكتى
اصل الحروف لما إتنست
ترجمها قلبه ف نظرتك
لما اترمت ع الارض مكسوفة قوى
والنينى بيشاغب عيونه بالقوى
والرموش اتشبكوا ...ضموا الجفون
الـ شهريار الـ كان ملك
اتحاشت الكلمات ف حلقه
وهو لسه حيسألك
هى الهجاية الصعبة ولا
انتى مدارية الكلمتين؟
ولا الحروف خلف الرموش
مكسوفة تنطق ف العينين؟
كان الجواب قبل السؤال
ف نظره هادية بترفعيها
ووقتها
سافر جلالته ف رحلة النظرة
اللى هيمن سحرها
على كل اركان مملكة سفك الدما
وقتل الحريم
على صولجان المُلك والعرش العظيم
روضتى هذا الشهريار
الـ كان ملك يا فاتنة
آه لو أكونه
أو يكوننى
أو تروض نظرتك
عبثى أنا
