@ الركن الحزين @
تمنيتك تفهمنى .. و تشيل همى ..
من غير ماترهبنى .. و لا تقتل إبنى ..
و ناديتك و إستنيتك و إترجيتك ما تألمنى .
لقيتك بتهدمنى وتكسر إيد بتبنى
أنا اللى إخترت هواك ,,
ومشيت على خطاك
عجبنى مظهرك
وغرتنى ضحكتك ..
صدقت وعودك ..
سحرتنى بسمتك ,,
ونسيت محتواك .
ولما غوصت فى بحرك ,,
سمعت شكواك
وشفت خباياك
لقيتك من قصرى بتطردنى
وتكفرنى
وتجرجرنى
وتهدهدنى
تحاول تمحينى
وتشرب من دمى
وتبكى تراب الأرض ,,
لما يضمنى ويأوينى ,
وتخنق ضحكة الورد ,,
لما يفارق حنينى ,
*************
اللغط راكبك ,,
وياريتك راكب مراكبك !!
راكب مراكب التوهه !!
عايم ف بركة دم ..
هايم وعشقك هم ..
لا شايف خال ولا عم
ولا حاسس بالمواجع
حالف لامتحتح ولا راجع .
وإنك ليك مبدأك ..
وإذا قلت ,, الكل سمعك وصدقك ,
وتقول ف القصر دا إنك راضع !!
وأنت لفكر غيرك خاضع !!
******************
وف الركن الحزين ,
بتحفر بسكين
وتدبر وتخطط
وتجور وتتنطط
وتقتل الضحكة وتدفن الأمل
متشعلق ف حبل وقابض
وحبلك دايب مارابط
ونسيت الشوك ف ضهرك المكسور !!؟؟
وتحاول تنط من فوق السور
لا ركبت جبيرتك ولا تركت عكازك
كأنك ملك نسور ,,
أو قائد جسور ,,
وأنت اللى زرعت الأنين ف بساتينى
ودخانك ف الهوا,,
عمره ما ح يقطف تينى
ومن دمى وشرايينى
ح تنبت رياحينى ,
ــــــــــــــــــــــــــــــــــــــــــــ
